Nubo, fiskur ofl.

Jæja ekki er ofsögum sagt að órólegheit séu í stjórnarsamstarfinu, tómar uppákomur. Nú hefur Nubo verið hafnað en eins og kunnugt er þá vildi hann fá undanþágu til að kaupa Grímsstaði á fjöllum og varð það niðurstaða Ögmundar, háttvirts Innanríkisráðherra að hafna beiðni þessa prúða ljóðskálds sem bara brosti og gaf af sér mikinn þokka. Það var að minstakosti álit Samfylkingarfólks en mér fannst nú kveða við annan tón eftir höfnun, þá gaf þessi hugprúði ljóðamaður út yfirlýsingu í kínverskum blöðum sem líktust meira því sem við mátti búast af meðlimi kommúnista flokksins kínverska, vondu vesturlöndin að kúga vinnandi alþýðuna í Kína...

Mér fannst tvennt mjög undarlegt í öllu þessu máli, í fyrstalagi gauragangur sumra alþingismanna út af þessu máli. Möllerinn, Árni Páll og maðurinn með fálkanafnið fóru á kostum í hallærislegum hótunum fávitaskap sem sýndi rétt einu sinna að á hinu háa Alþingi eru ekki allir gáfnaperur, nei ekki aldeilis. "Ég ætla að íhuga stöðu mína" sagði ein peran. Þeir heimtuðu að Ömmi færi ekki að lögum a.m.k. myndi fara á svig við lögin og leyfa kínastjórn að kaupa 3% af landinu okkar. Ég segi kínastjórn því það hvarflar ekki að mér að Nubo þessi sé auðmaður eða fjárfestir hann er bara réttur og sléttur starfsmaður kínastjórnar, hverjum dettur í hug að til séu "auðmenn" í alþýðulýðveldinu Kína þar sem allt er í eigu ríkis og alþýðu. Auðmenn sem ekki eru á vegum stjórnarinnar væru umsvifalaust fangelsaðir fyrir þjófnað, það er minn skilningur eftir að hafa lesið Moggann í 50 ár, í Kína er enginn ríkari en annar, það er bannað punktur.

Svo er það kvótakerfið okkar, nú er Jón sjávarútvegs búinn að kasta fram frumvarpsdrögum um breytingar á þessu bölvuðu kvótakerfi sem Jóhanna forsætis segir að verði aldrei sent þinginu sem stjórnarfrumvarp. Það er svosem ekkert skrítið ef ég hef skilið þessi drög rétt eru þau eins langt frá upphaflegu kosningaloforðum stjórnarflokkana og hægt er, nánast framlenging af því kerfi sem nú er við líði en ef ég man rétt þá var firningarleiðin það sem lofað var sem þíddi að innkalla átti allar heimildir og úthluta þeim aftur þannig að gjald yrði greitt fyrir nýtingaréttinn. En Jón Bjarna "gaf" makrílkvótann þannig að ekki er hægt að komast lengra frá upphaflegri ætlun ríkisstjórnarinnar um að þjóðin fengi eðlilegt gjald fyrir nýtingarréttinn, þar með missti þjóðin um 5 milljarða á yfirstandandi fiskveiðiári beint ofaní vasa útgerðarmanna og munar um minna. 

Nú er rétt að biðja Guð að hjálpa sér!!

SjálftökuFlokkurinn hefur legið yfir því að greiða atkvæði um Evrópu málin í allan dag til að fá niðurstöðu sem er gamlingjunum í flokknum hugnanleg, já gamlingjunum, þarna virtust vera tómir gamlingjar sem réðu ferðinni poppuðu upp hver af öðrum flestir löngu hættir í pólitík í orði kveðnu en virðast ráða ótrúlega miklu enda dýrkaðir eins og guðir, allir 1600 fundarmennirnir stóðu upp þegar DO fór í pontu.

Þessi ólýðræðislegi Flokkur gerir það sem engin annar stjórnmálaflokkur kæmist upp með, að kjósa þangað til "rétt" niðurstaða fæst í mjög umdeildu máli. Og svo þetta bölvað klapp í tíma og ótíma og grenjur þegar þessir lýðskrumarar eru að mæra hvorn annan, þá er bara ekki hægt að halda aftur af táraflóðinu "fyrirgefðu Geir snökt snökt"  ekki vissi ég að Geir væri holdgerfingur þjóðarinnar en það var hún sem verðskuldar afsökun ekki gerandinn sjálfur.

Bjarni Vafningur sagði að nú þyrfti að koma ríkisstjórninni frá og SjálftökuFflokknum til valda, manni dauð bregður þegar þetta er sagt því sporin hræða svo sannarlega.  Og er best að biðja Guð að hjálpa sér eins og síra Sigvaldi gerði í leikritinu svo eftirminnilega. Ef þessi þjóð kemur þessu græðgisliði til valda á ný skal ég ekki vorkenna henni þegar hún verður rænd því sem eftir er, til dæmis lífeyrirsjóðunum okkar en það varð svolítið eftir í þeim vegna mistaka hjá SjálftökuFlokknum þegar þeir gáfu bankana, sparisjóðina og önnur fjármálafyrirtæki þá gleymdist að breyta lögum til að gera það kleyft að gefa þá líka, hver man ekki "fé án hirðis frasanum" sem Pétur Blöndal fann upp og Flokkurinn ærðist yfir greind þessa manns og breytti lögum í hvelli til að hægt væri að gefa sparisjóðina til Sjálfstæðishirða sem hirtu allt. Þeir gleymdu lífeyrissjóðunum í hamaganginum sem varð þegar þetta lið æddi um fjármálakerfið okkar hrifsaði allt sem á vegi þess varð, hreinlega allt.

Ég trúi því ekki að Guð sé svo vondur aða illa innrættur að hann láti það gerast að þessir ræningja lýður komist til valda aftur meðan ég tóri, það get ég svarið. Nóg verður að vita af hækjuflokkunum leika lausum hala og bjóða aleigu þjóðarinnar í skiptum fyrir valdastóla.

Blessaðir "menninir" sagði amma.

Ég hló mikið áðan þegar ég las eitt eyjubloggið, þar var á ferðinni maður sem var að koma frá útlöndum (og þurfti að koma því að) og hafði orðið var við hóp fólks á flugvellinum sem var að koma frá kanaríeyjum en hann frá Danmörku. Þetta er svo sem ekkert hlægilegt en að hann sagðist hafa heyrt útundan sér á tal fólksins að eingin úr hópnum hefði dáið úr matareitrun í ferðinni??

Og það er heldur ekki hlægilegt en maðurinn var með þessum ummælum að sanna, hygg ég, að ekki væri matareitrun í gangi í löndum ESB og okkur væri alveg óhætt að borða mat frá þeim löndum, þetta er hlægilegt og um leið ótrúleg óskammfeilni hjá manni sem er eða var framalega í verkalýðshreyfingunni og ætti að nota betri rök fyrir til dæmis inngöngunni í ESB, en þetta gefur smá sýnishorn af ofstopanaum sem tröllríður þessari umræðu, kannske hafa rökin fyrir launahækkunum verið svipaðar og sér þá hver maður að ekki er von á góðu.

Það sem maðurinn hefur sennilega verið að reyna að sanna er að ekki sé nauðsynlegt að framleiða matvörur á íslandi eins og sumir telja, heldur flytja þær bara inn því þær séu alveg öruggar frá ESB löndunum og lausar við sýkingar, óþarfi að basla við að framleiða þær hér á landi. En reyna að telja okkur trú um að hópur sem þú gengur framhjá í Leifsstöð tilkynni þér hve margir dóu úr matareitrun í túrnum eða dóu ekki, sé sönnun þess að matur sé öruggur í öllum ESB löndum er fáránlegt. 

Matvæli á Íslandi eru ekki 100% örugg hvað varðar matareitrun enda oftast, en ekki alltaf,  um krossmengun af mannavöldum að ræða sem getur gerst allstaðar þar sem menn vinna við matvæli. Hins vegar er rétt að halda því til haga að ef menn eru að tala um landbúnaðarvöruframleiðsluna á búunum sjálfum þá er það marg reynt að sýkingar eru oftar greindar á stórum búum og í evróplöndunum eru mörg gríðarlega stór bú. Við sem störfum við þessa framleiðslu hér á landi vitum þetta, en lítið þýðir að tala um það þar sem rök eins og hér fyrir ofan koma á færibandi og kaffæra alla eðlilega umræðu um þessi mál. Allir geta "googlað" allt um matareitranir ef þeir kæra sig um, td. hér eða hér 

Sumir halda því fram að evrópusambandið greiði ekki niður landbúnaðarvörur eins og gert er hér á landi, það er alrangt það heitir bara öðru nafni "beinn markaðsstuðningur" ekki "niðurgreiðsla". Evrópusambandið styrkir landbúnaðarframleiðsluna sína gríðarlega, einnig sjávarútveginn sinn og dreifbýlið ( rural development) þetta geta menn skoðað á vef sambandsins til dæmis hér 

Budget 2011 in figures

Krónan, bullið og ofstækið.

Ég er 100% Evrópusinni með stórum staf, en ekki evrópusambandssinni það er á hreinu ég er heldur ekki sjálfstæðismaður, framsóknarmaður né vinstri grænn en vinstrisinnaður samt og hef alltaf verið utan flokka og þar með frjáls maður og get sagt það sem mér sýnist  þegar mér sýnist án þess að vera með sjálfsritskoðun og horfa á allt í gegnum flokksgleraugu.

Það sem ég vildi sagt hafa varðandi það ofstæki sem tröllríður þessu krataliði á  blogginu er þetta, manni verður bara illt að lesa þetta bölvað ofstæki og yfirdrepshátt sem margir þessara kratabloggara viðhafa. Guðmundur Gunnarsson kenndur við rafiðnaðarsambandið gæti verið einn þeirra, en til að gæta sannmælis þá hefur hann margt til síns ágætis og er með all góða þekkingu á verkalýðsmálum og skárra væri það nú, hann hefur unnið við verkalýðsmál í áratugi, en þar ætti hann að halda sig og láta vera að þykjast vera sérfræðingur í evrópusambandinu og málefnum þess. Hann og fleiri "sérfræðingar" virðast nefnilega halda að ESB sé góðgerðarhreyfing sem vilji endilega fá litla Ísland í hópinn sinn af gæsku einni, þannig er það auðvitað ekki, við verðum rukkuð um hverja einustu krónu sem okkur er "gefin" með vöxtum.

Mikið held ég að þeir í Brussel hlæi dátt, ef þeir þá skilja eitthvað af því sem haldið er fram á "kratabloggunum" um gæsku þeirra. Því er til dæmis haldið  fram að ef við tökum upp evru og göngum í ESB muni seðlabanki bandalagsins standa við bakið á okkur alveg frítt, kostar ekki eina krónu og við spörum mörg hundruð ef ekki þúsund milljarða á því að þurfa ekki að eiga gjaldeyrisvarasjóð, hverslags bölvað rugl er þetta trúa menn þessu sjálfir, auðvitað ekki. Býr eitthvað að baki því að troða okkur í þetta bandalag með góðu eða illu? Já svo sannarlega held ég það, við það að ganga í ESB verður til fjölmenn elíta embættismanna sem verður handvalinn úr "já-hópnum" og fær mikil völd, sér um að framfylgja tilskipunum frá Brussel og að margfalda eftirlitsiðnaðinn,  sem mörgum þykir nóg um í dag en það er bara lítið sýnishorn af því sem koma skal.

Flestir á mínum aldri muna eftir "Marshall-hjálpinni" sem við fengum frá kananum og hverjir úthlutuðu henni, einnig munum við eftir "varnarliðinu" sem hingað kom og mokaði peningum inn í okkar litla efnahagskerfi en auðvitað í gegnum landráðaflokkana. Til þess var meðal annars stofnað verktakafyrirtæki (Íslenskir aðalverktakar/Sameinaðirverktakar) sem fekk/fengu alla vinnu fyrir herliðið og var þess kirfilega gætt að þar stjórnuðu íhaldsframsóknarkratar. Ekki ætla ég mér að útlista allt það sóðalega sukk og viðbjóð sem þar viðgekkst. Allir sem ekki voru með flokksskírteini í þessum viðbjóðslegu sukkflokkum gátu étið það sem úti frýs.

Ég skal vera fyrstur til að viðurkenna að íslenskir stjórnmálamenn eru þeir lang verstu í heimi en það lagast ekki við inngöngu í ESB, síður en svo því að í orði kveðnu skiptir ESB sér ekki af því hverjir eru kosnir og við munum áfram kjósa vonda stjórnmálamenn sem munu sukka sem aldrei fyrr og þá í boði ESB. Engin trúir í hjarta sínu að ESB leysi einhver mál hjá okkur, heldur eru margir orðnir þreyttir á þeim þjófalýð sem hefur stolið öllu steini léttara frá okkur og freistast til að halda ESB hjálpi okkur, en látum ekki blekkjast. Tóku menn ekki eftir þessari frétt sem sýnir að hið háa Alþingi er enn að setja lög sem eru gagngert til að vernda þjófa. Ég tel að við náum aldrei neinu af þessum skepnum heldur þver öfugt þeir munu ná af okkur öllu sem eftir er, svoleiðis er það bara, með eða án ESB aðildar.

Lífeyrissjóðaumræðan í tísku núna.

Lífeyrissjóðirnir (LS) eru nú til umræðu og eru ekki allir á eitt sáttir hvað þá verðar. Sumir vilja leggja þá niður en aðrir halda því fram að þeir séu lífæð launafólks, hvorugt er rétt að mínu mati. Fásinna væri að legga kerfið niður en það mætti eflaust laga það eitthvað en vandinn er, að ekki er hægt að tala um það, því ef einhver dirfist að vekja máls á til dæmis að skoða hvernig því var stjórnað fyrir og í hruninu eða hve óheyrilega dýrt það sé í rekstri, umhverfast einhverjir sjálfskipaðir varðhundar þessa kerfis og tala um vanþekkingu, líðskrum og illar hvatir og undantekninga lítið eru það verkalýðsforkólfar sem hafa sig í frami. En staðreyndin er sú að lang flestir sem ég hitti og ræða lífeyrissjóðina við mig segjast ekki hafa þekkingu á þeim, það kann ekki góðri lukku að stýra og svo sér maður fólk rífast um þetta kerfi á bloggsíðum og er þá eins og menn séu að tala um sitt hvorn hlutinn svo ólíkar eru skoðanir manna.Þetta er ábyggilega flókið kerfi sem fáir skilja en margir tjá sig um.

Það er ekki þannig að menn fái alltaf lifibrauð úr sjóðunum á efri árum, það þekki ég og dæmin sem oftast eru notuð eru til að sanna ágæti sjóðanna eru ekki endilega raunveruleg heldur sýnist mér þau vera dæmi um mann sem greiðir í sjóðinn í 40 ár og hafði svo og svo háar tekjur einnig er miðað við að sjóðurinn sé verðtryggður með 3,5% raunávöxtun. Ég hef sjálfur greitt í sjóðina síðan þeir voru fundnir upp, fyrst fékk maður sparimerki í launaumslagið sem maður límdi í bækur og fór með í bankann til að hann gæti rænt þeim af manni, því aldrei sá ég tangur né tetur að þeim aurum enda örugglega lítilsvirði, síðar var þetta lagt beint á reikning í bankanum og hét þá skyldusparnaður eða eitthvað í þá áttina, var dregin af launum manns 15% að mig minnir og gat nýst manni til íbúðarkaupa seinna og þannig var það í mínu tilfelli og munaði verulega um þá peninga sem útborgun en hvað um það í dag fæ ég stundum, ekki á hverju ári, yfirlit yfir uppsöfnuð lífeyrisréttindi og eru þau ekkert í samræmi við það sem áðurnefnd dæmi eiga að sýna, langt frá því.

Ég mun fljótlega ná þeim aldri að kallast ellilífeyrisþegi (67 ára) ekki hlakka ég til þess að lifa á þeirri hungurlús sem Tryggingastofnun og lífeyrissjóðirnir munu skammta manni, það segi ég satt. Ég er ekki hálaunaður í dag en þó sýnist mér að mikill niðurskurður verði að eiga sér stað í lifistandard og þó ekki sé úr háum söðli að detta í því efni. Það er ömurlegt til þess að vita að fjöldi fólks er jafnvel verr staddur en ég, það veit ég fyrir víst.

Vonandi kemst lífeyrissjóða umræðan á hærra plan en hún hefur verið þar sem þöggun hefur ríkt og varðhundar hafa gelt sig hása yfir umræðunni sem hefur varla verið umræða finnst mér, heldur nöldur yfir því hve lítið mann fá út úr sjóðunum þegar að því kemur og svo hitt að maður eigi að fá miklu meira en raunin er, sýnt með rugl dæmum.